Nýtt – Umvæling av føroyska bátinum

Í ár hevur tað eydnast at gera eitt skeið í “Umvæling av føroyska bátinum”. Í fyrru helvt av seinastu øld vóru mangir bátasmiðir í Klaksvík, men tað er eingin loyna, at føroyskt bátasmíð er eitt útdoyggjandi handverk. Eisini at umvæla føroyskan bát er eitt handverk, sum fá bjóða seg fram at gera í dag. Tí fegnast vit um, at Janus Østerø, sum hevur umvælt føroyskar bátar í mong áratíggju, nú fer at hava eitt skeið í at umvæla føroyska bátin.


Skeiðið hevur ein teoretiskan part og ein praktiskan part. Teoretiski parturin fer fram í einari skúlastovu, har kunnað verður um ymiskt, sum er skrivað um bátin. Tann praktiski parturin av skeiðnum gongur fyri seg norðuri á Grótrætt, har Janus plagar at umvæla bátar. Vit vóna, at við hesum skeiðnum kunnu vit vera við til at varpa ljós hetta serstaka handverkið og halda lív í tí og harvið varðveita føroyska mentan.

---

---